Starvsfelagið greiðir stovnum frá um happing

Fyrr í vikuni vóru umboð fyri Starvsfelagið á fundi við trygdarnevndini hjá IRF, har umboð fyri leiðslu og starvsfólk vóru við. IRF hevur ynski um at seta sjóneykuna á sálarliga arbeiðsumhvørvið, og tí tosaðu vit um limakanningina um happing á arbeiðsplássinum. Vit nýttu eisini høvið at tosa um limakanningina um førleikamenning, sum Starvsfelagið gjørdi í fjør.

Síðan úrslitini av kanningini hjá Starvsfelagnum um happing á arbeiðsplássinum vóru kunngjørd á heysti í fjør, hevur stórur áhugi verið fyri kanningini á stovnum og arbeiðsplássum kring landið. Vit í Starvsfelagnum verða javnan boðin út á arbeiðsplássini at greiða frá kanningini og úrslitunum, sum vístu, at fimti hvør limur hevur kent seg happaðan á arbeiðsplássinum seinasta árið. Hetta eru skelkandi tøl fyri okkum øll, og vit gleðast um, at so nógvar leiðslur á ymsum stovnum taka úrslitini í álvara og bjóða okkum inn at tosa meira um henda risastóra trupulleika.

Síðan seinasta heyst hevur Starvsfelagið lagt kanningina fram fyri m.a.: sáttmálapørtunum, lønardeildin hjá Fíggjarmálaráðnum og Kommunala Arbeiðsgevarafelagnum, Vinnuhúsinum - herundir Føroya Tele, Posta og Vága Floghavn - , Sjúkrahúsverkinum, Umhvørvismálaráðnum, TAKS, Umhvørvisstovuni, Almannaverkinum, Havstovuni, og sum nevnt IRF.

Um aðrir stovnar ella arbeiðspláss hava áhuga í at hoyra meira um kanningina um happing, so er bara at heita á okkum.

Umboð fyri IRF og Starvsfelagið á fundi, har limakanningarnar um happing og førleikamenning vóru umrøddar. Frá vinstru: Andrias Joensen, IRF, Súni Selfoss, Starvsfelagið, Jóannes Guttesen, Hanus Árnason Lervig, Poul Andrias Joensen, Suffía Høj, øll frá IRF.