Starvsfelagið gerst grønari

Sólpanel og hitapumpur: Síðan nevndin í Starvsfelagnum gjørdi av at seta felagið á grønu kósina og gera íløgur í grøna orkuskiftinum fyri góðum ári síðan, er nógv hent.

Fyri ikki so langari tíð síðani varð orkuskipan við sólpanelum endaliga góðkend, og í dag tóku vit luft-til-vatn hitapumpu í brúk.

Grøna kósin

Seinastu árini hava vit miðvíst arbeitt fram ímóti at gera raksturin av Starvsfelagnum meira burðadyggan. Tað hevur ført við sær, at vit byrjaðu við at legga eina ætlan um, hvørji mál vit skuldu røkka.

Byrjað var við at gera ein umhvørvispolitikk, sum umfatar orkupolitikk, nýtslupolitikk og innkeypspolitikk. Hetta merkir m.a., at vit hugsa grønt, tá vit keypa vøru inn til skrivustovunýtslu og tiltøk, vit skilja rusk og endurnýta mest møguligt, og vit hava sett arbeiðið í gongd at skifta til aðrar orkukeldur.

Sólpanelskipan

Avtala varð gjørd við ráðgevingarfyritøkuna AFRY um at standa fyri verkæltanini um at leggja sólpanel á takið á Smæruni. Hetta skuldi vera so mikið stórt, at tað skuldi klára at útvega streym til bæði Starvsfelagið og Smæruna, har Barna- og útbúgvingarmálaráðið húsast í dag og har vit eisini hava eitt stórt og gott auditorium til almenna nýtslu.

Avtala varð síðandi gjørd í oktobur 2023 við Leif Mohr um at standa fyri arbeiðinum.

Um hálvan í mars mánað var arbeiðið liðugt. Fyrsta tíðin var brúkt sum royndartíð og síðani hava vit bíðað eftir eini góðkenning av skipanini. Henda góðkenning kom so fyrst í august mánað og síðani tá, hava vit framleitt okkara egna streym, umframt at vit senda avlopsframleiðsluna á netið hjá SEV.

Mynd: Súni Selfoss (vinstrumegin), formaður í Starvsfelagnum, og Kenneth Johannesen (høgrumegin), tekniskur stjóri í Leif Mohr, tá sólorkuskipanin varð handað Starvsfelagnum.

Skipanin higartil hevur verið serastakliga gevandi fyri Starvsfelagið. Í summar hava vit framleitt meira orku, enn vit klára at brúka, og tað hevur føroyski orkubrúkarin eisini notið gott av, tí avlopið fer út á netið hjá SEV og harvið út til føroysku húsarhaldini.

Skipanin, sum Starvsfelagið hevur gjørt íløgu í, hevur eina garanteraða livitíð upp á 25 ár, og okkara metingar siga, at íløgan hevur vunnið seg innaftur upp á 12-15 ár.

Mynd: Dømi um mánaðarnýtslu av sólorku hjá Starvsfelagshúsunum: í juni 2024 var nærum helvtin av framleiddu orkuni avlop (643,57 kWh), sum var latið SEV.

Luft-til-vatn hitaskipan

Næsta stig á leiðini at gerast meira burðardygg var tikið í vár, tá nevndin tók avgerð um at leggja um frá olju til grønu orkuskipanina luft-til-vatn hitapumpu.

Avtalað varð í juni mánaði gjørd við Krosstein um at seta upp hitapumpur bæði til Starvsfelagið og Smæruna, og longu nú er fyrsti partur av arbeiðinum liðugt og tikið í brúk. Talan er um hitapumpuna til Starvsfelagshúsið. Arbeiðið at seta hitapumpurnar upp til Smæruna byrjar beinanvegin, sum hetta arbeiðið er liðugt.

Mynd: Sjúrður Olsen, tekniskur ráðgevi hjá Krosstein (vinstrumegin), og Súni Selfoss (høgrumegin), tá fyrstu hitapumpurnar vóru tiknar í nýtslu. 

Ein bjartari framtíð

Tað sæst heilt týðiligt á nýtsluni og útreiðslunum, at vit hava lagt um til grøna streymorku, og tá hitapumpuskipanin er liðug, eru vit leys av oljubrúkinum og tað fegnast vit um.

Nevnd og umsiting eru ikki í iva um, at vit sum fakfelag eiga at ganga á odda fyri at verja um náttúruna og umhvørvið. Tað kann tykjast sum ein evarska lítil partur av samlaðu heildini, men mangir løkir smáir gera stórar áir, og tað gevur okkum og eftirkomarum okkara eina vón um eitt betri umhvørvi í komandi tíðum.

Í erva síggjast nýggju sólpanelini á tekjuni á Smæruni, sum veitir Starvsfelagnum og Smæruni streym. Mynd: Jens Kr. Vang