Samgongan ætlar sær ikki at lurta eftir fakfeløgunum

Hetta er greitt eftir almenna orðaskiftið, sum var í Smæruni týskvøldið 8. apríl. Fakfelagssamstarvið skipaði fyri orðaskiftinum og allir politisku flokkarnir fingu í boði at luttaka, tó hevði Miðflokkurin forfall.

Fyri politisku flokkarnar luttóku: Beinir Johannesen fyri Fólkaflokkin, Bárður á Steig Nielsen fyri Sambandsflokkin, Aksel V. Johannesen fyri Javnaðarflokkin, Eirikur í Jákupsstovu fyri Tjóðveldi og Ruth Vang fyri Framsókn. Beinta Løwe var orðstýrari.

Øll fakfeløg mæla frá

Flokkarnir fingu hvør í sínum lagi høvi at greiða frá teirra sjónarmiðum um uppskotið, sum er lagt fram um at hækka pensjónsaldurin til 70 ár. Hóast øll fakfeløg, sum hava latið inn hoyringsskriv um uppskotið, eru ímóti broytingini, so vænta samgonguflokkarnar at fáa meiriluta fyri uppskotinum í tinginum, tá atkvøðast skal.

Hóast hetta, so sigur samgongan seg hava tikið viðmerkingar úr hoyringsskrivunum til seg viðvíkjandi ymisku heilsustøðuni hjá ymsum fakbólkum. Ein gjøgnumgangandi táttur úr skrivunum hevur verið, at fólk slítast ymiskt á arbeiðsmarknaðinum, og tí ber ikki til at skera øll yvir ein kamb við einum pensjónsaldri á 70 ár. Eitt nú bar Eirikur í Jákupstovu uppskot í tingið týsdagin, sum gevur teimum, sum hava verið á arbeiðsmarknaðinum síðan tey fóru úr fólkaskúlanum, møguleika at fara á pensjón eftir 50 ár á arbeiðsmarknaðinum, í fyrsta lagi sum 66 ára gomul. Harafturat eru møguleikar fyri framskundaðari pensjón og fyritíðarpensjón í verandi skipan.

Eftirlýsa aðrar loysnir

Andstøðuflokkarnir løgdu undir orðaskiftinum dent á, at teir ikki taka undir við uppskotinum, soleiðis sum tað sær út nú, og fara tí ikki at atkvøða fyri tí. Hóast tað, siga andstøðuflokkarnir, at teir ætla sær ikki at rulla nakað aftur, sum er samtykt, um teir koma í samgongu eftir næsta val.

Teir siga seg eftirlýsa aðrar loysnir uppá haldføristrupulleikan, eitt nú talaði Bárður á Steig Nielsen fyri at avtaka mótrokningina fyri pensjonistar, ið framhaldandi eru virknir á arbeiðsmarknaðinum. Hetta er m.a. gjørt í Danmark, har pensjonistar kunnu arbeiða so nógv teir ynskja uttan mótrokning í fólkapensjónini.

Fleiri spurningar vóru úr salinum, og mótrokning av pensjón var ein afturvendandi táttur. Samgonguflokkarnir ætla tó ikki at broyta skipanina við mótrokning av pensjón.

Tað neyðuga fyri framtíðina

Serliga Ruth Vang var bersøgin um, at henni dámar ikki at skula broyta pensjónsaldurin, men at hetta er ein avgerð, sum hon er vís í, er tann rætta fyri framtíðina. Hetta er m.a. við støði í tilmælunum frá Búskaparráðnum, sum í nógv ár hevur talað fyri, at pensjónsaldurin hækkar. Hetta hóvar sjálvandi ikki veljaranum, men Ruth Vang heldur fast í avgerðini, eisini um tað merkir, at hon ikki verður afturvald til næsta val, segði hon undir orðaskiftinum og vísti á kreppuna í 1990'unum sum dømi um, hvussu galið tað kann ganga, um haldføristrupulleikin ikki verður tikin í álvara.

Orðaskiftið vardi ein góðan tíma og varð tikið upp á video. Stroymt varð frá tiltakinum og orðaskiftið kann síggjast her.