Burturvísing

Í hesum partinum kanst tú lesa um, hvørji krøv, reglur og mannagongdir galda, tá ið alment sett starvsfólk verða víst burtur. Tað er at siga starvsfólk úr starvi uttan uppsagnartíð og -løn.

Í serligum førum kunnu starvsfólk verða burturvíst. Tá verða starvsfólk ofta send heim beinanvegin, og rætturin til lønina steðgar samstundis.

Burturvísingin er harðasta starvsrættarliga revsiatgerðin og má bert verða nýtt í teimum mest álvarsomu starvsfólkamálunum. Starvsfólk kunnu bert vísast burtur, um tað er neyðugt, og um onnur minni víðgongd stig – so sum ávaring ella uppsøgn – ikki kunnu loysa trupulleikarnar.